38 €
Plena Manlibro de Esperanta Gramatiko 2020
PMEG – la verko pri la Esperanto-gramatiko, kiu devas ne manki en via libroŝranko!
La Plena Manlibro de Esperanta Gramatiko (PMEG) estas verko por ordinaraj esperantistoj, kiuj volas detale studi la gramatikon, vortfaradon, skribon kaj elparolon de la Internacia Lingvo.
PMEG estas unuavice praktika lernilo, ne teoria verko por lingvistoj. Ĝi provas klarigi la lingvon en facila maniero – kaj la plej bazajn aferojn, kaj tre specialajn detalojn. Ĝi uzas por helpi al la klarigoj abundon da ekzemploj, inter kiuj estas multege da ekzemploj el la Fundamento kaj la verkaro de Zamenhof.
PMEG traktas kaj modernan kaj klasikan lingvouzon. Esence PMEG estas konservema verko, kiu multloke defendas la Fundamentan kaj Zamenhofan lingvaĵon kontraŭ diversaj reformemaj ideoj kaj uzoj, sed ĝi ankaŭ prezentas modernajn uzojn kaj evoluojn, eĉ tiajn, kiujn iuj eble opinias tro drastaj.
Kio estas nova en ĉi tiu eldono? Respondas la aŭtoro
La nova eldono de PMEG – sub la nomo PMEG 2020 – estas profunde tralaborita eldono. En preskaŭ ĉiu sekcio mi faris korektojn aŭ kompletigojn, aŭ prilaboris la prezenton por ke ĝi estu pli klara. Mi aldonis multegajn novajn ekzemplojn, kaj ankaŭ ialoke forigis iujn ekzemplojn superfluajn. Iuj gravaj sekcioj estas preskaŭ tute reverkitaj laŭ novaj eltrovoj kaj ideoj. Multfoje okazis, ke demandoj, kiuj estis senditaj al mi, igis min aldoni novajn klarigojn al PMEG. Kaj mi aldonis tute novan ĉapitron “Pri la gramatikaj terminoj en PMEG”.
La ŝanĝoj estas ege tro multaj por ke mi povu ilin komplete prezenti. En la TTT-ejo de PMEG ekzistas listo de multaj el la plej menciindaj eroj, sed eĉ tiu listo montras nur etan onon el la ŝanĝoj. Mi povas ĉi tie nur mencii kelketajn specimenojn:
- En la klarigoj pri vortfarado per A-finaĵo mi tute ŝanĝis la gravan sekcion pri “Aga radiko sed eca signifo”. Antaŭe mi tie defendis la uzon de ekz. “korekta” kun la senco “senerara, ĝusta”. Nun mi anstataŭe aliĝis al la kritiko de tia uzo.
- Mi prilaboris, kompletigis kaj vastigis la sekcion pri komparaj esprimoj kun “kiel” kaj “ol”.
- Mi prilaboris la klarigojn pri “Si en kompleksaj frazoj” aldonante plurajn novajn subsekciojn kun gravaj kompletigoj.
- Mi aldonis multe pli da Zamenhofaj ekzemploj. En multaj lokoj mi anstataŭigis elpensitajn ekzemplojn per aŭtentikaj Zamenhofaĵoj.
- Mi kompletigis la klarigojn pri la GE interalie aldonante sekcion pri “Modernaj komprenoj pri seksa varieco”.
- Mi sufiĉe profunde prilaboris kaj kompletigis la sekcion pri “Seksa signifo de O-vortoj”.
- En la ĉapitro pri pronomoj mi aldonis klarigojn pri “ĝiismo” (uzado de ”ĝi” por homoj). Kaj mi tie kreis apartan sekcion pri la neoficialaj pronomoj “ri” kaj “ria”.
- Mi tute refaris la alfabetan indekson. Ĝi estas nun pli kompleta kaj pli preciza.
Diris pri PMEG
Jen kion pri PMEG diras famaj esperantistoj:
Mi forte konsilas vin almenaŭ mordeti la PoMEGon, por havi ordegon en viaj frazetoj. Se vi intencas verki frazegojn, tiam estas via devo nepre mordegi ĉi tiun ĉefan frukton de nia ĝardeno – rezisti tiun tenton estus peko!
Zamenhof ofte nomis Esperanton “lingvo arta.” Ĉi tiu verko plivastigas nian kapablon aprezi la multajn kaj profundajn dimensiojn de tiu arto.
Plej aktuala kaj fidinda konsultlibro pri ĉiaj demandoj kaj aspektoj de la ne tiom facilega gramatiko de Esperanto.
Sub ĉi tiu kilogramatiko eble suferos via librobreto, sed fortikiĝos via cerbo. Estu kun ĝi en konsultaj rilatoj!
Pri la facileco kaj reguleco de Esperanto oni konvinkadas per la 16 reguloj, per Poŝamiko aŭ Ŝlosilo. Post trastudo de la impona PoMEGo vi certe ŝanĝos viajn opinion kaj strategion kaj parolos konvinkite pri la riĉeco de nia lingvo.
Multaj parolantoj de Esperanto atingas mezan nivelon de lingvoscio sed neniam plene regas la lingvon – kvazaŭ rajdi biciklon, sed ŝanceliĝe. Por plene ĝui la lingvon kaj plene regi ĝin, oni devas koni ĝin bone. Jen la verko por tion atingi.
Surbaze de profunda kono de la reale uzata lingvo, jen la plej utila, detala gvidilo pri ĝia gramatiko.
Mi ofte konsultas PMEG, kiu estas plena de bonaj konsiloj kaj utilaj klarigoj.
Pri la aŭtoro
Bertilo Wennergren naskiĝis en Svedujo en 1956. Li parolas Esperanton de 1980. De 2001 li estas membro de la Akademio de Esperanto.
Li ne nur estas la aŭtoro de PMEG, sed laboras ankaŭ pri la Tekstaro de Esperanto kaj pri la interreta versio de la Plena Ilustrita Vortaro, konsilas pri Esperanto en Duolingo, kaj faras multon alian por helpi lernantojn kaj uzantojn de la Internacia Lingvo.
Li estas konata ne nur kiel esperantologo, sed ankaŭ kiel pioniro de la Esperantlingva rokmuziko, precipe kiel kunfondinto de la bando Persone.